Кратка женска фризура, шминка, ѓердан од бисери и шарена кошула од седумдесеттите – ваков бил изгледот на мажот кој сега е под истрага, на фотографија што ја доставил во матичната служба во италијанскиот град Борго Вирџили, пренесува “Кориере дела Сера”.
-На прв поглед, изгледаше како постара дама, но некои сомнителни детали не ѝ избегаа на службеничката, која веднаш ги известила своите претпоставени кога 85-годишната жена наводно се појавила за да ѝ издадат нова лична карта. Откако беа известени градоначалникот и локалната полиција, беше покрената внатрешна истрага во текот на која ја споредија фотографијата направена пред две недели со онаа на нејзината лична карта, направена пред десет години.
Се откри дека пензијата не ја подигала домаќинката и вдовица Гразиела Дал’Олио, туку нејзиниот невработен син, кој претходно работел како медицински техничар, а кој се преправил во својата мајка за да продолжи да ја прима нејзината пензија.
Властите веруваат дека Дал’Олио била мртва веќе подолго време, бидејќи со години не се слушало ништо за неа. Сепак, износот на нејзината пензија бил значителен – вкупно околу 53.000 евра годишно, поради комбинација од медицинска семејна пензија и приходи од семејни имоти, куќи и земјиште.
Нејзиниот син секоја година ја поднесуваше даночната пријава потпишана како Гразиела Дал’Олио. Службеничката го повика назад, велејќи дека треба да ја заврши документацијата, но тој беше пресретнат од полицијата, пред која сè призна.
Му рекоа дека треба да извршат претрес на неговиот дом, на што тој само воздивна и рече: “Напред”. Во една од собите полицијата го пронајде мумифицираното тело на неговата мајка, пренесе Corriere della Sera.
Деск
