Општина Кавадарци ја започна реализацијата на проект за осветлување на пешачки премини, со вкупна вредност од 1.000.000 денари. Проектот има за цел подобрување на безбедноста на пешаците и зголемување на видливоста во сообраќајот, особено во вечерните часови.
Со предвидените активности ќе бидат осветлени вкупно 20 пешачки премини на повеќе фреквентни сообраќајници во градот, и тоа: на улицата Илинденска (5 премини), улицата Тиквешко Востание (3 премини), улицата 7-ми Септември (3 премини), како и на кружниот тек кај сала „Партизан“ (3 премини). Дополнително, ќе се интервенира и на улиците Гоце Делчев (1 премин), Народни Херои (1 премин), Страшо Пинџур (1 премин), булеварот Моша Пијаде (2 премина), како и на Западниот булевар кај Капела (1 премин).
Од општината информираат дека станува збор за локации кои досега биле недоволно осветлени, што претставувало потенцијален ризик за учесниците во сообраќајот. Со поставување на современи LED светилки се очекува значително подобрување на условите за движење и зголемување на безбедноста на пешаците.
Локалните власти најавуваат дека ќе продолжат со инвестиции во инфраструктурата, насочени кон унапредување на квалитетот на живот на граѓаните.
В.К.
