Од регионалниот стационар за згрижување животни „Шепа“, лоциран во населбата Глишиќ во Кавадарци најавуваат нова едукативна иницијатива насочена кон основношколците, со цел подигнување на свеста за одговорно сопствеништво на кучиња и хуман однос кон животните.
Како што истакнуваат од стационарот, програмата ќе се реализира во основните училишта преку предавања, разговори и практични совети, при што учениците ќе имаат можност да се запознаат со клучни аспекти од грижата за домашни миленици.
„Целта ни е децата да научат што значи да се биде одговорен сопственик, како правилно да се грижат за куче, како безбедно да им пристапуваат на животните и зошто е важна грижата и хуманоста кон бездомните кучиња,“ порачуваат од „Шепа“.
Оттаму додаваат дека преку вакви активности се стремат кон создавање на посвесни и поодговорни генерации, кои ќе развиваат емпатија, почит и љубов кон животните.
Иницијативата, како што велат од стационарот, претставува чекор кон градење похумано општество, во кое благосостојбата на животните ќе биде заедничка одговорност на сите граѓани.
Деск
