Македонија е на прагот на значајна дигитална трансформација која ќе донесе директни придобивки за граѓаните – укинување на дополнителните трошоци за роаминг при користење мобилни услуги во земјите на Европската Унија.
Според најновите информации, земјава се позиционира како лидер во регионот во процесот на усогласување со европските регулативи за телекомуникации. Целта е вклучување во системот „Roam like at Home“, кој веќе важи за земјите членки на ЕУ, а овозможува користење на мобилен интернет, повици и СМС-пораки без дополнителни надоместоци при престој во странство.
Од министерството за дигитална трансформација посочуваат дека интензивно се работи на исполнување на техничките и регулаторните услови, со што Македонија би станала првата земја од Западен Балкан што практично ќе го имплементира овој модел со ЕУ.
Во меѓувреме, Европската Унија најавува конкретни чекори за проширување на зоната без роаминг и кон земјите од регионот, а финалните одлуки се очекуваат во наредниот период. Овој процес се смета за дел од пошироката стратегија за дигитална интеграција и приближување на Западен Балкан кон европскиот пазар.
Експертите оценуваат дека укинувањето на роаминг трошоците ќе има силно позитивно влијание врз граѓаните, особено за оние кои често патуваат, работат или студираат во земјите на ЕУ. Истовремено, се очекува да се поттикне и економската соработка, туризмот и бизнис-комуникацијата.
Иако процесот нема да се реализира веднаш, најавите дека Македонија е чекор пред другите земји од регионот даваат надеж дека „роаминг без граници“ наскоро ќе стане реалност за македонските граѓани.
Деск
