Малото неготинско село Војшанци се подготвува за второто издание на Вилиџ Фестивал, која минатата година на први август се одржа премиерно, и привлече огромен број на посетители.
Лани главна музичка ѕвезда беше ,,Галија”, додека пак за годинава од организацијата најавуваат поинаков концепт, со српскиот музичар Само Боб како главна атракција на сцената, но и со учество на кавадаречката група Трио Мањифико и диџеј Були.
Зад организацијата стои Александар Додев и неговата Ки-Ја рекордс продукција, а за Викимедиа појаснува дека годинава очекува уште поголема масовност на настанот.
-Минатата година генерален спонзор беше компанијата Кожувчанка, годинава зад фестот застана компанијата Дим Метал од Неготино, а добивме поддршка и од Општина Неготино. Благодарни сме на општината, како и на општествено – одговорната компанија Дим Метал, кои застанаа зад овој значаен настан чија првична цел беше да го заживее Војшанци, да покаже дека и во малите места може да има добра забава и случувања со интересна содржина кои ќе привлечат посетители, вели Додев.
Додава дека многу му значи тоа што жителите на Војшанци го прифатиле и поддржале фестивалот, на кој гледале како на бренд кој допрва треба да расте.
-Ова е нешто кое ќе остане и за идните генерации. Лани бевме изненадени од големиот интерес на публиката, годинава очекуваме уште повеќе посетители, појаснува организаторот.
Локацијата ќе биде на ракометното игралиште во Војшанци, а Александар вели дека им ветил на мештаните како секоја наредна година фестивалот ќе се подобрува и дека ќе се бори да биде вброен помеѓу најпопуларните вилиџ фестивали во земјава.
Вики Клинчарова