Влатко Миладиноски, популарниот изведувач на македонски народни песни е првиот од домашната фолк естрада кој ќе одржи солистички концерт во Антички театар Охрид. Сцената на која редовно настапуваат музичари од соседството, ќе ги отвори вратите за Миладиноски и неговата публика на седми август, а од организацијата на настанот – Балкан Медиа, очекуваат успешен концерт за кој долго ќе се зборува.
За Викимедиа Влатко вели дека ова е голем предизвик за него, со оглед на тоа што досега ниту еден негов колега од фолк браншата не се решил да застане на сцената на Антички со самостоен концерт. Додава дека е време да се рушат бариерите и предрасудите, и да започнеме повеќе да си го цениме своето.
-По успешниот концерт во Национална опера и балет, кој се одржа во јуни, спонтано се наметна идејата за нешто големо, посветено на публиката со многу љубов. Организаторот Балкан Медиа застана зад идејата, а според досегашните искуства верувам дека ова е вистинскиот чекор.
Решив да рушам бариери, се надевам дека заедно со мојот тим ќе успееме да ги смениме досегашните пракси. Јас верувам во моите колеги, знам дека тие имаат храброст, но како да и недостига еден вид на пркос или провокација на нашата фолк естрада, за да ја покаже својата вредност.
Токму поради тоа, еве јас им пркосам на нашите докажани, квалитетни и талентирани фолк музичари, сакам да ги испровоцирам да не се двоумат, заедно да покажеме дека македонската народна песна има своја публика, народот ја сака и ја слуша, ние можеме да полниме концерти сали, имаме ризници од квалитетни песни кои ќе им останат на идните генерации и должни сме да ги промовираме, вели Влатко.
Појаснува дека на сцената во Антички театар ќе го придружува неговиот брат Златко со оркестар од 30 членови. Програмата веќе била комплетирана, но повеќето од деталите се чувале како изненадување за публиката.
-Најодговорно тврдам дека за македонската народна песна, не само што има интерес, туку има и потреба од неа! Мораме да го цениме и негуваме своето, секој на свој начин да дадеме придонес за нашата земја. Конкретно ние, музичарите, со негување и промовирање на фолк мелосот, како во Македонија, така и ширум светот, со гордост треба да ја носиме улогата на културни амбасадори, истакна Миладиноски.
Тој заедно со неговиот брат Златко е со музиката од најрана возраст и двајцата се музички образовани. Внуци се на легендарниот народен пејач Војо Стојановски.
Вики Клинчарова