Веќе трет ден семејството на неготинецот Димитар Костадинов (82), како и полициски службеници, трагаат по него. Неговите блиски за Викимедиа раскажуваат дека станува збор за витален човек, со почетна фаза на деменција, кој секојдневно излегувал на прошетка и се враќал дома.
-Нашиот дедо во неделата, на 20-ти јули, бил излезен низ градот, се вратил дома, одморил, ручал, а потоа, како што беше неговата секојдневна рутина, после ручекот пак излегол малку да се разоди.
Од тогаш, значи од околу 15 часот во неделата, ние не знаеме ништо за него. Излезен е по влечки, во црни пантолони и бела кошула.
Има почетни знаци на деменција, но сепак функционира добро, ако некој го забележи и му се обрати, тој одговара, комуницира најнормално. Има мали проблеми со слухот, но генерално, тој беше подвижен човек кој функционираше добро со оглед на својата возраст. Никогаш во минатото не се случило вакво нешто.
Се проверуваат камери и се трага по него, а семејството ја замолува јавноста, ако некој има било каква информација, да пријави во полиција, апелира неговата внука.
Случајот е пријавен во полиција. Од СВР Велес информираат дека на 21-ви јули во 11.00 часот во ОВР Неготино, В.К. (51) од Неготино, пријавил дека од домот се оддалечил неговиот татко Д.К. (82).
Се превземале мерки за негово пронаоѓање.
Вики Клинчарова