Струмичанката Тина воодушеви на најгледаното талент шоу во Германија: Глас кој го крена студиото на нозе!

Дваесет-годишната Тина Русева од Струмица, која со семејството живее во Германија, го воодушеви жирито и публиката на мега популарното музичко шоу „The Voice of Germany“ (Гласот на Германија), а нејзиниот настап се емитуваше вчера.
Младата девојка, чија мајка Верица исто така се занимава со пеење, а татко и Љубе е музичар и свири на тапани, предизвика еуфорична атмосфера за време на настапот. Таа настапи со песната на Jessie J – “Do It Like A Dude” и ги крена на нозе присутните во студиото. Видеото од изведбата на Тина веќе се споделува на социјалните мрежи, и има десетици илјади прегледи.
-Најдобрата изведба на песна од Џеси Џеј која сме ја слушнале, Фантастичен настап, Честитки за девојката од Македонија… се само дел од коментарите кои ги објавуваат гледачи на шоуто од сите страни на светот, на музичкиот канал Јутјуб, каде е објавен настапот на Тина.
Таа пак, на нејзиниот Фејсбук профил пред неколку дена објавила емотивна порака по повод учеството во глобално популарното талент шоу.
-Драга музико,
ти беше мојот таен јазик кога зборовите откажуваа, мојот невидлив пријател во тишината,
мојата сила во секоја бура и радост во секоја насмевка.
Никогаш не замина кога сè друго замина.
И сега, еве ме водиш до централната сцена на ,,The Voice Of Germany”.
Но, не било која сезона!
Ова е јубилејната 15-та сезона, прослава на сите ѕвезди, легенди и незаборавни гласови.
А и јас меѓу нив.
Ти благодарам што никогаш не ме остави да го одам својот пат сама.
Ова е за тивкиот сонувач кој се осмели да пее гласно и за бестрашниот глас кој одби да биде замолчен.
До 4-годишната мене, малото девојче кое ја претвори четката за коса во микрофон и пееше како целиот свет да слуша – Ти успеа, објавила Тина Русева, големата музичка надеж за која синоќа се слушна надалеку.

Во прилог, линк од настапот на Русева

https://www.youtube.com/watch?v=6YVPb1SMXM8

Вики Клинчарова