Продолжува кампањата на МОН „Магијата е во знаењето“, соопшти министерската за образование и наука, Весна Јаневска, која вчера беше во Тетово, каде се одржа панел дискусија преку која се прави паралела на образованието и оценувањето, некогаш и сега.
-Разликата е во промената на методите на учење и подучување, примената на нови технологии како вештачката интелигенција, фокус кон нови области, кон нови вештини…
Но и тогаш и сега, во образованието има нешто подеднакво важно – наставникот кој е клучна алка и ниту една технологија не може да го замени.
Иако тоа е така, за жал долг период наставничката професија била девалвирана, не само од претходната Влада која се потврди дека покажа лажна грижа, туку и од многу поединци, родители, моќници во општеството, објави Јаневска, која додава дека Владата била цврсто определена да го подобри статусот на наставниците.
-Пред 16 месеци предложивме цел сет мерки кои ќе го подобрат нивниот економски статус, ќе ги унапредат нивните компетенции, мотивираноста и ќе ја подигнат продуктивноста. Тие мерки се реализираат. За 12% повисоки плати и гаранции за постојан годишен реален раст, 67 милиони евра во инфраструктурни инвестиции, воведување едносменска настава која е попродуктивна и во моментов 200 училишта ја имаат воведено, а лани беа 150-тина.
Организираме обуки на разни теми од интерес на наставниците и откако сум министер со поддршка од Светска банка вложени се преку 700 илјади евра за обука, а дадовме и можност за кариерен развој преку напредување во звање ментор и советник, што исто така значи повисоки лични приходи.
Продолжуваме понатаму. На иста страна сме, ќе ги поддржуваме, а тие ќе возвратат со придонес во градење поквалитетен образовен систем, истакна министерката.
Деск
