Верица Ристевска (71) е дел од златната генерација на македонската забавна музика, која и остави ризница од безвременски хитови на Македонија. ,,Летај галебе”, е баладата што остави неизбришлива трага во музичката историја и стана синоним за една пејачка, која по децении продолжува да живее како нејзина лична карта и е еден од најголемите евергрини на нашата сцена.
За овој хит музиката и анранжманот се на легендарниот Кире Костов, а текстот е на Миодраг Врчаковски. И денес, децении подоцна, кога ќе зазвучат првите ноти на ,,Летај галебе”, јасно е дека станува збор за песна која не познава време. Евергринот продолжува да живее, а заедно со него и приказната за една уметница чиј глас засекогаш остана врежан во срцата на слушателите.
Нејзините ,,Летај галебе”, ,,Ти си песна што ќе трае”, ,,Признај ми”, ,,Збогум, збогум Марија”, ,,Без нежност”, ,,Штом се сака”, ,,Ти само збори”… како тивки сведоци на времето, продолжуваат да живеат и да потсетуваат дека вистинската уметност никогаш не старее.
Во 2015 година Ристевска доби Златна Бубамара – Награда за трајни вредности за безвременски хитови, заедно со Зорица Поп Панкова и Даниела Панчетовиќ.
Деск
