Легендарниот кошаркарски тренер Душко Вујошевиќ денес беше погребан на Новите гробишта, во присуство на семејството, пријателите и бројни личности од спортскиот и јавниот живот. Но, најтрогателниот момент од последното збогување беше оној што го одбележа неговиот најверен придружник – кучето Жута.
Додека бројни кошаркарски легенди, меѓу кои Жељко Обрадовиќ, Александар Ѓорѓевиќ и Предраг Даниловиќ дојдоа да му оддадат почит на човекот кој го одбележа КК Партизан, вниманието на многумина го привлече токму Жута – тивкиот сведок на животот надвор од теренот.
Покрај сопругата Ана и синот Лука, Жута стоеше мирно меѓу присутните, како да го разбира значењето на моментот. За Вујошевиќ, тој не беше само миленик, туку дел од семејството и негов секојдневен придружник. Нивната поврзаност беше добро позната меѓу блиските, а неговото присуство на погребот внесе дополнителна емоција и човечка димензија во целиот настан.
Комеморацијата, исполнета со говори и сеќавања, заврши со песната ,,Pamtim samo sretne dane” во изведба на Габи Новак, но токму сликата на верното куче покрај ковчегот остана најсилниот симбол на збогувањето.
Со заминувањето на Душко Вујошевиќ, кошарката загуби голем стратег и учител, но сцената со Жута потсети дека зад спортската легенда стоеше човек исполнет со топлина, љубов и искрена приврзаност.
Деск
Фото: Никола Томиќ