Министерот за здравство, Азир Алиу, се обрати на промоцијата на протоколот за постапување со лица без државјанство, организирана од ОБСЕ и Министерството за внатрешни работи, при што истакна дека здравствениот систем има клучна улога во нивното прво препознавање и заштита.
Како што наведе Алиу, лицата без лични документи најчесто првиот контакт со институциите го остваруваат токму преку здравствените установи, а не преку административните служби. Посебно ја нагласи ситуацијата со мајки без здравствено осигурување или идентификациски документи, кои најчесто пристапуваат до системот во моментот на породување.
„Токму во тие моменти здравствениот систем станува мост кон основните човекови права“, истакна министерот, додавајќи дека преку Програмата за мајки и деца, финансирана од Министерството за здравство, се обезбедува бесплатно породување и здравствена грижа за оваа категорија граѓани.
Алиу се осврна и на дигиталниот модул во системот „МојТермин“, кој овозможува евидентирање на здравствени услуги за лица без лични документи. Со доделување единствен идентификациски број преку надлежните институции, овие лица можат да бидат внесени во системот и да имаат електронско здравствено досие.
Според него, ваквиот пристап овозможува континуитет во здравствената заштита и создава институционална трага што е значајна за натамошни правни и административни постапки, како и за нивна подобра интеграција во општеството.
Деск
