Европската унија усвои нов пакет правила со кои за првпат се воспоставуваат заеднички стандарди за заштита и следење на кучиња и мачки во сите земји-членки. Мерките имаат за цел да ја намалат нелегалната трговија со домашни миленици, да го подобрат нивното благосостојба и да воведат поголема одговорност кај сопствениците и одгледувачите.
Според новите правила, сите кучиња и мачки во Европската унија ќе мора да бидат микрочипирани и внесени во национални бази на податоци, кои потоа ќе бидат меѓусебно поврзани на ниво на ЕУ. Ова треба да овозможи полесно пронаоѓање на изгубени животни и спречување на нелегална продажба.
Законот предвидува различни преодни периоди:
до 4 години за одгледувачи, трговци и засолништа за животни
до 10 години за сопственици на кучиња
до 15 години за сопственици на мачки
Со ова, Европската унија дава подолг временски период за прилагодување на новите обврски.
Новата регулатива воведува и забрани за практики што се сметаат за штетни за животните, вклучувајќи:
-одгледување блиско сродни животни
-селекција на екстремни физички карактеристики што го нарушуваат здравјето
-кастрирање или модификации за естетски цели на изложби
-користење на несоодветни средства за ограничување на движењето
Се заоструваат правилата и за внесување на домашни миленици од трети земји. Животните ќе мора да бидат чипирани и регистрирани пред влез во ЕУ, со цел да се спречи нелегалната онлајн трговија и шверцот.
Европската комисија истакнува дека новите правила треба да обезбедат повисок стандард на благосостојба на животните, поголема транспарентност во трговијата и поефикасна борба против злоупотребите.
Иако промените нема да се применуваат веднаш, тие претставуваат значаен чекор кон унифицирана политика за заштита на домашните миленици во Европската унија.
Деск
