Министерството за внатрешни работи поднесе кривични пријави против четири малолетнички во врска со случајот на врсничко насилство што ја вознемири јавноста во скопската населба Ѓорче Петров.
Според информациите од МВР, пријавените се осомничени дека во повеќе наврати физички и психички малтретирале малолетно девојче. Насилството, како што посочуваат надлежните, се случувало континуирано, а дел од инцидентите биле и снимани, што дополнително ја зголеми загриженоста во јавноста откако снимките почнаа да се шират на социјалните мрежи.
Во рамки на истрагата, полицијата извршила разговори со повеќе лица, меѓу кои и родители, со цел целосно расчистување на случајот. Од МВР информираат дека постапката се води во координација со надлежното обвинителство, кое треба да одлучи за понатамошните чекори.
Случајот отвори поширока дебата за врсничкото насилство и улогата на институциите, училиштата и родителите во негово спречување. Надлежните апелираат на поголема вклученост од сите засегнати страни, истакнувајќи дека превенцијата и раната реакција се клучни за заштита на децата.
Деск
