ЗДРАВСТВЕНИОТ СИСТЕМ ЌЕ СЕ ЈАКНЕ ЗА УСПЕШНИ ТРАНСПЛАНТАЦИИ, КАЖА МИЦКОСКИ И ПОВИКА НА ПОГОЛЕМА ЈАВНА СВЕСТ ЗА ОРГАНОДАРИТЕЛСТВО

На вчерашната трибина посветена на органодарителството и значењето на трансплантацијата, премиерот Христијан Мицкоски истакна дека органодарителството претставува еден од највозвишените хумани чинови, кој директно спасува животи и ја отсликува највисоката форма на човечка солидарност.
Во своето обраќање, тој нагласи дека темата за дарувањето органи ја надминува медицината и институциите, бидејќи, како што рече, се работи за суштински човечки вредности – љубов, грижа и подготвеност да се помогне на непознат човек во најтешките моменти.

Премиерот посочи дека секоја трансплантација претставува нова шанса за живот за пациентите кои долго чекаат на листите за органи, нагласувајќи дека зад секој успешен медицински зафат стојат човечки приказни исполнети со надеж, борба и истрајност.
Посебен акцент беше ставен и на улогата на семејствата на донорите, кои во моменти на лична трагедија донесуваат тешка, но хумана одлука – да овозможат живот за други луѓе. Според премиерот, токму нивната храброст претставува силен пример за општеството.

Во обраќањето беше изразена и благодарност до здравствените работници – лекарите, хирурзите, анестезиолозите, координаторите и медицинските сестри – кои, како што беше истакнато, работат под постојан притисок и со огромна одговорност, често надвор од редовното работно време, со единствена цел: спасување животи.
Премиерот порача дека државата ќе продолжи со инвестиции во здравствениот систем, современа опрема, едукација на кадарот и развој на трансплантациската медицина, со цел таа да се унапредува и да станува поефикасна.
Тој исто така нагласи дека е неопходно зголемување на јавната свест за органодарителството и отворен разговор во општеството за оваа тема, бидејќи секој човек може да се најде во улога на пациент кој чека орган, но и потенцијален донор кој може да спаси нечиј живот.

На крајот од обраќањето, беше пренесена пораката дека најголемото богатство на едно општество се луѓето, а највисока вредност е хуманоста и солидарноста, кои продолжуваат да живеат преку секоја спасена човечка приказна.

Деск