Кавадарци добива нов современ спортски објект во рамки на Спортскиот центар „Јасмин“, откако денес беше поставен камен-темелникот за изградба на објектот.
На настанот присуствуваа претседателот на Владата Христијан Мицкоски, министерот за спорт Борко Ристовски и градоначалникот на Кавадарци Митко Јанчев.
Според информациите што ги сподели градоначалникот Јанчев, проектот се реализира преку вториот повик на Владата и претставува една од најзначајните инвестиции во спортската инфраструктура во општината.
Новиот објект ќе се простира на површина од 1.000 квадратни метри и ќе содржи современа куглана, сала за гимнастика и седум апартмани за сместување на спортисти. Вкупната вредност на инвестицијата изнесува 118 милиони денари.
Со реализацијата на проектот се очекува да се подобрат условите за тренинг и одржување спортски натпревари, како и да се создадат предуслови за развој на спортскиот туризам во Кавадарци.
Градоначалникот Митко Јанчев оцени дека станува збор за значајна инвестиција во спортот и младите, која ќе придонесе за понатамошниот развој на општината и за унапредување на спортската инфраструктура.
