Илјадници граѓани во Турција побараа враќање на функцијата на гувернерот на провинцијата Ардахан, Мехмет Фатих Чичекли, кој беше разрешен откако предизвика јавна дебата со објавите на социјалните мрежи на кои се гледа како вози велосипед облечен во спортска опрема.
Чичекли беше отстранет од функцијата минатата недела со декрет потпишан од турскиот претседател Реџеп Таип Ердоган. Владата не даде официјално образложение за одлуката.
Неговото разрешување уследи по критики од дел од политичарите поради неговите активности на интернет. Пратеникот од опозициската Републиканска народна партија (CHP), Инан Аќгун Алп, го обвини гувернерот дека „цело време создава содржини за социјалните мрежи“ и дека „цел ден се движи меѓу граѓаните во велосипедски хулахопки“, оценувајќи дека тоа не одговара на функцијата гувернер.
Чичекли ги отфрли критиките и изјави дека облеката што ја носи е вообичаена спортска опрема. „Јас спортувам во спортска облека“, порача тој. По разрешувањето, на прашањето што ќе прави понатаму, одговори: „Ќе продолжам да ги вртам педалите“.
За време на својот мандат, Чичекли често промовираше спортски активности во Ардахан. Тој споделуваше видеа од велосипедски настани со голем број учесници, повикуваше на организирање велосипедски фестивал во провинцијата и објавуваше снимки од веслање на езерото Чилдир, нагласувајќи ја „обединувачката моќ на спортот“.
По неговото разрешување, на платформата Change.org беше покрената петиција со барање гувернерот да биде вратен на функцијата. До 21 јули, петицијата собра повеќе од 9.400 потписи.
Поддржувачите наведуваат дека Чичекли придонел за развој на спортот кај младите и за унапредување на велосипедскиот туризам во регионот. Во петицијата се оценува дека неговото разрешување предизвикало незадоволство кај дел од жителите на Ардахан.
Извор: BBC News