По вчерашното невреме што го зафати Скопје, кога силните налети на ветер откорнаа делови од лимени покриви на повеќе објекти, повторно се отвори прашањето: дали металните покриви се доволно безбедни при екстремни услови и дали класичните керамиди се подобра заштита?
Снимките од лимените табли кои ветерот ги носеше низ воздухот предизвикаа вознемиреност кај граѓаните, особено кај жителите на повисоките катови. Но, градежните стручњаци посочуваат дека проблемот најчесто не е самиот лим, туку начинот на кој е поставен.
„Добро монтиран лимeн покрив може да издржи многу силни ветрови. Најчесто попуштаат старите или неправилно поставените покриви – со недоволно прицврстување, слаби споеви или оштетена подлога“, велат познавачите на кровните конструкции.
Лимениот покрив е лесен материјал. Токму таа карактеристика го прави практичен за монтажа, но при силен ветер може да биде и ризик. Кога ветерот ќе навлезе под рабовите или под оштетен дел од покривот, создава сила на подигнување која може да откине цели панели.
Кај зградите ситуацијата е уште почувствителна бидејќи на поголема височина брзината на ветерот е поголема. Затоа покривите на високите објекти бараат посебно внимание при изведбата.
Крововите со керамиди имаат една голема предност – нивната тежина. Ветерот потешко ги подигнува, бидејќи секое парче има поголема маса и лежи стабилно на конструкцијата.
Сепак, при екстремни бури и тие можат да бидат оштетени. Скршени или поместени керемиди можат да доведат до навлегување вода и оштетување на внатрешноста на објектот.
Од финансиски аспект, лимен покрив најчесто е поевтин избор, особено ако се споредува почетната инвестиција.
Во пракса, цената зависи од видот на материјалот, изолацијата, дрвената конструкција и работната рака. Евтин лим со лоша монтажа може подоцна да стане поскап поради поправки, додека добро изведен покрив со керамиди може да трае многу долго.
Вчерашниот ветер не постави само прашање „лим или керамиди“, туку и прашање за квалитетот на изведбата. Покривот е систем составен од материјал, конструкција и прицврстување.
За објекти на изложени места, особено високи згради и куќи на отворен простор, стручњаците препорачуваат посебно внимание на отпорноста на ветер, без разлика дали изборот ќе падне на лим или керамиди.
Лимот е поевтин и може да биде сигурен, но бара беспрекорна монтажа. Керамидите се поскапи, но нивната тежина им дава природна предност при силни ветрови.
