СЕ БАРА ВОВЕДУВАЊЕ НА КАЗНИ ЗА ОТПАД ФРЛЕН ОД ВОЗИЛА

Еко движењето ,,За почиста Македонија” започна онлајн петиција, со која се бара воведување на казни за фрлање на ѓубре од автомобил.
Како што е наведено во петицијата, во Македонија веќе е поставен системот Safe City, кој во моментов функционира во тест фаза и преку видео надзор издава опомени за сообраќајни прекршоци.
Со оглед на тоа што технологијата веќе е инсталирана и активна, постои реална можност овој систем да се надгради и да придонесе и во други важни области од јавниот интерес.

-Една од појавите која долго време претставува проблем во нашата држава е фрлањето отпад, особено отпушоци и ситен отпад од возила во движење. Овој вид непрописно одложување отпад е чест и оставa последици врз животната средина и јавната безбедност.

Со оваа петиција се предлага, во рамките на понатамошното развивање на системот Safe City, да се разгледа можноста за воведување функционалност за детекција и санкционирање на фрлање отпад од возила.
Целта е не само спречување на прекршоците, туку подигање на јавната свест, намалување на загадувањето и зголемување на општата култура и одговорност во сообраќајот, истакнато е во петицијата, која веќе ја потпишале стотици граѓани.
Исто така, додаваат дека камерите веќе ја имале потребната технологија.

-Со оглед дека „Safe City“ камерите веќе препознаваат минување на црвено светло, неправилно паркирање, некористење појас, користење телефон, пребрзо возење и слично, системот може да се надгради со алгоритам за детекција на фрлање предмети од возило, практика која веќе ја има во повеќе европски земји и градови.
Ова е реално изводливо, без големи дополнителни трошоци, пишува во петицијата.

Деск