Претседателката Гордана Силјановска Давкова е во работна посета на Обединетите Арапски Емирати. Таа вчера се обрати на Светскиот самит на лауреати во Дубаи, во рамки на Светскиот самит на владите, а објави и дека се сретнала со македонски граѓани кои живеат и работат во Обединетите Арапски Емирати.
-Разговаравме за нивниот професионален ангажман и искуствата од животот во оваа држава. Посебно ме радува нивната успешна интегрираност во овдешното општество и нивното присуство на одговорни и значајни позиции. Тие се мост за соработка на економски и трговски план, но и во сите други општествени сфери. Наша задача е да овозможиме услови за искористување на потенцијалите што тие ги имаат.
Идеите што ги чув на средбата се уште една потврда за знаењето и посветеноста на македонските граѓани, каде и да живеат и работат, истакна претседателката.
Самитот обединува светски лидери, носители на одлуки и експерти во заедничка потрага по иновативни решенија за најголемите глобални предизвици и е простор за размена на искуства и зајакнување на меѓународната соработка.
-Годинава за темата на самитот „Обликување на влади на иднината“ разговараме со десетици шефови на држави и влади, стотици министри и претставници на над 150 држави, соопшти Силјановска Давкова.
Деск
