Додека бил во војска, на кутија од цигари го напишал текстот за песната ,,Jedne noći u decembru” и и го испратил на саканата Бранка, како роденденски подарок. Кога се вратил од војска, се венчале. Кемал Монтено (1948-2015) беше еден од најпознатите кантавтори од Босна. За неговите песни се вели дека се химна на вечната љубов, а тој не криеше дека Бранка е инспирација за сите негови љубовни песни.
-Секогаш кога поради турнеји заминував од дома, едвај чекав да се вратам. Го памтам секое мое враќање кај Бранка и децата, ќерката Андријана и синот Ѓани, раскажа во едно интервју. Со сопругата се запознале кога таа имала 16, а тој 18 години, и цели четири децении поминаа во љубов и слога.
Кемал Монтено почина на 67-годишна возраст, борејќи се со пневмонија и сепса, кои настанале како компликација по трансплантацијата на бубрег. На последното патување го испрати семејството, но и над 4.000 луѓе, пеејќи ја неговата песна “Sarajevo, ljubavi moja”, а погребан е во Алејата на великани на градските гробишта Баре, во Сараево.
-Во моментот кога ми јавија дека починал, помислив само, колку добар човек беше тој, всушност предобар, и колку многу го сакаше животот. Најважно ми беше дека ништо повеќе не го боли, раскажа за босанските медиуми Бранка, набргу по неговата смрт.
Деск
