ЛУКСУЗ НА МОРЕ: КОЛКУ ЧИНИ ИЗНАЈМУВАЊЕ ЈАХТА НА ЈАДРАНОТ?

Сѐ повеќе туристи кои летуваат на Јадранот избираат одмор на море со изнајмена јахта, но ваквото искуство носи и значителни трошоци. Цените за изнајмување пловила во текот на јули и август достигнуваат сезонски максимум, а покрај основниот наем, туристите треба да пресметаат и низа дополнителни трошоци.

Според податоците од чартер-компаниите, помал моторен брод или глисер со должина од околу десет метри може да се изнајми за околу 1.500 евра неделно во јули. Кај моторните јахти од средна класа, со должина од приближно 15 метри, цените значително варираат во зависност од големината, староста на пловилото и периодот на резервација. Така, неделниот наем може да се движи од околу 1.800 до повеќе од 23.000 евра.
Најголем дел од понудата во јули се движи меѓу 2.000 и 4.000 евра неделно, додека во август, кога побарувачката е најголема, цените најчесто се во распон од 3.000 до 7.000 евра. За оние што бараат врвен луксуз, таканаречените мегајахти започнуваат од околу 30.000 евра неделно, а цената може да биде и значително повисока.

Сепак, основниот наем е само дел од вкупните трошоци. За управување со моторна јахта потребна е соодветна дозвола, а во спротивно се ангажира скипер. Услугите на професионален скипер чинат приближно 200 до 250 евра дневно, што за седумдневно патување претставува дополнителен трошок од најмалку 1.500 евра.
На тоа треба да се додадат и трошоците за гориво, пристанишни такси, врзување во марини, како и чартер-пакетот што најчесто вклучува завршно чистење, постелнина, гас и основна опрема на бродот.
Според проценките, група од шест лица која ќе изнајми моторна јахта од средна класа може да потроши меѓу 5.000 и 9.000 евра за еднонеделен одмор, во зависност од маршрутата и дополнителните услуги. Тоа значи дека трошокот по лице се движи од околу 830 до 1.500 евра.

Иако ваквиот начин на летување се смета за луксуз, интересот за чартер-понудата на Јадранот останува висок, особено меѓу туристите кои сакаат да ги истражуваат островите и скриените заливи далеку од преполните плажи.

Деск