СВР Охрид поднесе кривична пријава против С.М.(43) од Охрид и против правен субјект со седиште во Охрид, поради постоење основи на сомнение за сторено кривично дело „повреда на правата од работен однос“, соопшти Секторот за внатрешни работи Охрид.
Станува збор за случајот во кој загина охридскиот снимател Кристијан Љушев (28), кој при извршување работни задачи во објект во изградба, паднал и се здобил со тешки телесни повреди. Тој паднал од петти кат од окно за лифт, а трагедијата се случи на 12 јануари годинава.
-Пријавениот С.М. во својство на сопственик и управител во правниот субјект, свесно не се придржувал кон одредбите од Законот за засновање на работен однос и во правното лице, уредно не го пријавил и не извршил работничко осигурување на сега починатиот работник К.Љ. од Охрид, со што му ги одзел и ограничил правата што му припаѓале.
С.М. дозволил пристап на сега веќе починатиот работник, на работно место кое е изложено на сериозни и специфични опасности, без притоа да добие посебни упатства за работа, односно дозволил да извршува работни задачи како помошник монтер, без притоа да изврши основна обука од областа на безбедност и здравје при работа и без соодветен здравствен преглед во здравствена ординација по медицина на трудот, соопштија од МВР.
Деск
