Македонски државјанин, кој се наоѓал во притворски центар во албанскиот град Валона, починал додека бил во притвор, откако претходно бил приведен под сомнение за кривично дело поврзано со дрога, објавија албанските медиуми. Во неговиот изнајмен стан во април била пронајдена голема количина на кокаин и марихуана.
Според информациите објавени од медиумите, станува збор за 57-годишниот Б.Л., македонски државјанин кој бил задржан во притворскиот центар во Валона. Околностите под кои настапила смртта засега не се целосно разјаснети, а албанските надлежни органи започнале истрага за случајот.
Медиумските извештаи наведуваат дека надлежното обвинителство наредило обдукција, која треба да ги утврди причините за смртта. Во меѓувреме, се прибираат докази и се сослушуваат лица кои можат да помогнат во расветлувањето на случајот.
Засега нема официјални информации дали смртта е поврзана со здравствени причини, евентуално насилство или други околности, а истрагата треба да даде одговор на овие прашања.
Македонските институции сè уште немаат објавено официјално соопштение во врска со случајот.
