Сообраќајот на граничниот премин „Богородица“ од македонска страна, односно граничен премин „Евзони“ од грчка страна денеска од 11 часот повторно е блокиран и за влез и за излез, информира Авто-мото сојузот на Македонија.
На граничниот премин „Ники“ од грчка, односно „Меџитлија“ од македонска страна, сообраќајот е блокиран само за товарни возила и автобуси, а непречено се одвива единствено сообраќајот на граничниот премин „Дојран“. 
Грчките земјоделци кои веќе со денови поставуваат блокади низ цела земја, незадоволни поради неисплаќањето на субвенциите, и вчера го блокираа Евзони, и тоа од 17 часот, а блокадата траеше до доцните часови. Поради тоа, илјадници македонски граѓани чекале и по повеќе од шест часа на граничниот премин Дојран, за влез во земјава.
Поради продолжениот празничен викенд, интензитетот на преминот беше зголемен, па километарската колона од возила на преминот Дојран предизвикала нервози кај Македонците, кои биле принудени да поминат часови заглавени во автомобилите.
Деск
