Македонските средношколци постигнаа значаен успех на 60-тата Меѓународна олимпијада по хемија – Менделеев, која годинава се одржа во Москва, Русија, освојувајќи два бронзени медала.
Теона Ана Георгиевска, ученичка во четврта година во ПСУ „Јахја Ќемал“ – Скопје, освои бронзен медал, со што го запиша и првиот „женски“ медал за Македонија во историјата на ова престижно натпреварување. Бронзен медал освои и Даниел Христов, ученик во четврта година во СОУГ „Славчо Стојменски“ – Штип.
Македонскиот тим го сочинуваа и Даниел Христовски (III година, ПСУ „Јахја Ќемал“ – Скопје) и Георги Николоски (IV година, СОУГ „Мирче Ацев“ – Прилеп), кои исто така достојно ја претставија државата.
Од Сојуз на хемичари и технолози на Македонија информираат дека успехот е резултат на континуирана работа, посветеност и поддршка на младите таленти во областа на хемијата.
Организаторите и тимот изразија благодарност до Амбасада на Руската Федерација во Северна Македонија, Лукоил Македонија и Општина Прилеп за нивната несебична помош и поддршка.
Менделеевата олимпијада по хемија се смета за едно од најпрестижните меѓународни натпреварувања за средношколци, на кое учествуваат најдобрите млади хемичари од целиот свет.
Деск
