Поранешниот министер за внатрешни работи и висок функционер на СДСМ, Оливер Спасовски, упати отворена самокритика за состојбите во партијата, признавајќи дека високите очекувања кај граѓаните резултирале и со сериозни разочарувања.
Во емисијата „Ноќно студио“ на 4ТВ, Спасовски нагласи дека СДСМ како политичка опција добила силна поддршка во минатото, но дека не успеала целосно да ги исполни надежите на граѓаните. Според него, токму тие големи очекувања ја зголемиле и тежината на разочарувањето кога резултатите не биле во согласност со ветувањата.
-Некој ќе рече дека фактор беше коалицискиот партнер (ДУИ), и тоа е точно. Но, мислам дека и самите ние – преку кадровската политика и одредени одлуки кои се носеа – влијаевме на ваквиот исход. Најмногу фалеше правда, поголема реформа во правосудниот систем и поинаков начин на функционирање. Граѓаните го очекуваа тоа по рушењето на претходниот режим, а големите очекувања секогаш резултираат со големи разочарувања, истакна Спасовски.
Тој посочи дека е неопходно искрено соочување со грешките и слабостите, како и внатрешна реформа во партијата, со цел да се врати довербата кај јавноста. Спасовски потенцира дека самокритиката не е слабост, туку предуслов за напредок и обновување на политичката кредибилност.
Воедно, тој повика на поголема одговорност, транспарентност и посветеност кон реформите, истакнувајќи дека само преку конкретни резултати може да се надмине разочарувањето кај граѓаните.
Изјавата на Спасовски доаѓа во период кога СДСМ се соочува со предизвици на политичката сцена, а неговите зборови се толкуваат како сигнал за потреба од промени и нов пристап во делувањето на партијата.
Деск
