Основното јавно обвинителство за гонење организиран криминал и корупција веќе неколку месеци спроведува предистрага за можни недозволени активности поврзани со компјутерскиот систем во кабинетот на претседателката Гордана Сиљановска-Давкова.
Според информации објавени во Слободен печат, постапката е иницирана по анонимна кривична пријава доставена до обвинителството, потпишана од наводна „група вработени во МВР“. Во пријавата се изнесуваат сомнежи дека ИТ-администратор во кабинетот копирал, енкриптирал и складирал доверливи податоци, со можност дел од нив да биле споделени со странски разузнавачки служби.
Од Основно јавно обвинителство за гонење организиран криминал и корупција потврдуваат дека уште од декември се преземаат истражни дејствија, вклучително и издавање наредби за анализа на компјутерска опрема и мобилни телефони. Сепак, како што посочуваат, сè уште не е доставен комплетен извештај од страна на Министерство за внатрешни работи, ниту пак се обезбедени сите побарани материјали, меѓу кои и снимки од видеонадзор.
Од МВР потврдуваат дека се одземени електронски уреди и дека нивната анализа е во тек, но без дополнителни детали за текот на истрагата или евентуалното декриптирање на податоците, пренесе Слободен печат.
Надлежните институции засега не откриваат повеќе информации, а од обвинителството нагласуваат дека станува збор за предистрага. Тоа значи дека во овој момент нема поднесено обвинение, ниту потврдени докази за евентуална шпионажа или оддавање доверливи информации.
Јавноста очекува разврска на случајот, кој отвора сериозни прашања за безбедноста на институциите и заштитата на доверливите државни податоци.
Деск
