Економскиот консултант и стопанственик Горан Рафајловски предизвика реакции во јавноста со ставот дека платите на министрите во Македонија не треба да бидат пониски од 10.000 евра. Тој во емисијата „Бизнис 21“ изјави дека високите функционери треба да бидат добро платени, но истовремено и строго казнувани доколку има корупција. 
„Ако сакате да нема крадење, тогаш треба да се платат. Сега, многу ќе ме плукаат, но според мене платите на министрите не смеат да бидат помали од 10.000 евра! Но, ако краде, тогаш минимум 20 години затвор. Ќе видите дека тогаш државата ќе има помал трошок“, рече Рафајловски, додавајќи дека министрите би требало да добиваат и награди доколку донесат големи инвестиции во државата.
Неговата изјава доаѓа во период кога платите на функционерите повторно се тема во јавноста. Според официјално објавени податоци, актуелните министерски плати во Македонија се движат околу 115.000 денари нето, додека премиерската плата изнесува околу 140.000 денари.
Деск
