Девојче на возраст од 13 години се здобило со тешки повреди, откако вчера било удрено со возило со италијански национални ознаки, кое го управувал маж од Македонска Каменица.
Настанот се случил во Македонска Каменица, и малолетничката била пренесена во Клиничка болница Штип. Возачот бил лишен од слобода во раните утрински часови и му биле измерени 1,99 промили алкохол.
-Денеска (13.08.2025) во 02.10 часот на ул.„Каменичка“ во Македонска Каменица, полициски службеници од Полициското одделение Македонска Каменица го лишиле од слобода Г.А.(51) од Македонска Каменица. Тој се сомничи дека околу 23.00 часот на 12.08.2025 со патничко возило „мерцедес“ со италијански национални ознаки, кое го управувал, удрил во 13-годишна малолетничка од Македонска Каменица и го напуштил местото. Малолетничката се здобила со тешки телесни повреди и била пренесена во Клиничка болница Штип за укажување помош, соопштија од Министерството за внатрешни работи.
Од таму додаваат дека по преземени мерки Г.А. бил пронајден, при што било констатирано дека е под дејство на алкохол, односно му биле измерени 1,99 промили алкохол во крвта и бил лишен од слобода.
Тој бил задржан во полициска станица и по целосно документирање на случајот против него ќе биде поднесена пријава по член 297-а од Кривичниот законик – „безобѕирно управување со моторно возило, соопштија од МВР.
