По само неколку недели од јавната објава на апелот за помош, собрани се потребните средства за хируршка интервенција на малата Лилјана Коцева од Неготино. Операцијата ќе се изврши на клиника во Турција, а семејството Коцеви со емотивни зборови им се заблагодарува на хуманите граѓани кои се вклучија во акцијата.
За ВИКИМЕДИА, мајката на Лилјана, Наталија, вели дека треба да бидат во Турција на 19-ти декември, кога на Лилјана ќе и бидат земени мерки во фирма која е специјализирана за изработка на медицински корсети, а на 22-ри декември била закажана операцијата.
-Ви благодариме од дното на нашето срце. Нашата ќерка е малa хероина – силна, храбра и светла. Од првите моменти кога ја видевме, знаевме дека е посебна, дека во себе носи светлина што може да ги стопли сите околу неа.
Но, животот и донесе предизвици што малку кој би можел да ги издржи. И токму во тие моменти, вие бевте тие што ни подадовте рака. Вашата љубов, поддршка и човечност ни ја вратија вербата дека чудата постојат. Секој ваш збор, секоја помош, секоја објава и донација – беше како топлина што не држеше.
Нашата мала хероина секој ден се бори со насмевка, со радост во очите и со сила поголема од нејзината возраст. Таа е убава не само на надворешноста, туку и со своето срце полно љубов, со нежност и со светлина што ја шири околу себе. Секој чекор напред, секоја насмевка, секој миг кога успева да ги надмине тешкотиите е доказ за нејзината храброст и упорност.
Вие, драги пријатели, станавте дел од таа приказна. Вашата љубов и поддршка и дадоа ветар во крилјата. Вие помогнавте да ја чуваме нејзината насмевка, да ја поттикнеме нејзината надеж и да ја увериме дека светот е место каде ДОБРИНАТА ПОСТОИ.
Благодарение на вас, денес таа може да продолжи да расте, да се развива и да го живее својот живот со радост и насмевка. Секој од вас остави трага во нашиот живот, во нејзиниот живот, во приказната што заедно ја создадовме. Со вашиот гест, со вашето срце и со вашата хуманост, вие ја направивте вистинска разлика, создадовте чудо кое ќе го паметиме засекогаш.
Ви благодариме што станавте дел од животот на нашата ќерка, што ни помогнавте да ја чуваме нејзината светлина, нејзината насмевка и нејзината надеж. Нека добрината што ја покажавте се врати кај секој од вас со уште поголема радост, љубов и среќа. Со неизмерна љубов, почит и благодарност, порача фамилијата Коцеви.
Нивната ќерка Лилјана е родена со церебрална парализа и зад себе веќе имала четири операции. Сега, во Турција, треба да и биде извршена операција на колк и колена, после која семејството се надева дека ќе се подобри мобилноста на девојчето. За операцијата беа потребни 13.000 евра, кои хуманите граѓани ги собраа за краток период.
Вики Клинчарова