ЏОНИ ШТУЛИЌ ЌЕ БАРА ОТШТЕТА ОД 10.000 ЕВРА ОД ГРУПИТЕ КОИ ГИ ИЗВЕДУВААТ НЕГОВИТЕ ПЕСНИ: ИМАТЕ ОДОБРЕНИЕ ДА ЧИСТИТЕ УЛИЦИ, А НЕ ДА НАСТАПУВАТЕ НА ТУЃ ГРБ!

Бранимир Џони Штулиќ повторно го привлече јавното внимание со строга изјава со која забранува изведба на своите песни од белградскиот трибјут-бенд “Филиграни”, како и од сите други групи што настапуваат под името “Почит на Азра”.
Фронтменот на “Азра”, кој со години постојано инсистира на заштита на своите авторски права, изјавува дека не му дал дозвола на никого да ги користи во својот репертоар и дека ќе бара финансиска компензација за сите идни неовластени настапи.

Во објавената изјава, Штулиќ наведува дека забраната ја вовел поради, како што тврди, долгогодишното игнорирање на неговите протести, кои, како што вели, траат од 1995 година. Тој истакнува дека трибјут-бендовите не само што немаат негова согласност, туку со своите лоши интерпретации ги упропастуваат неговите песни и уметничката идеја што тие ја носеле.

Во изјавата, Штулиќ вели: ,,Трибјут бендот Филиграни нема дозвола да ги свири моите песни, исто како што ниту еден трибјут бенд на Азра нема, и покрај тоа што ја ширеа оваа лага преку медиумите за да можат да настапуваат низ регионот и пошироко на туѓ грб. Со ова издавам забрана за изведување на моите песни од белградскиот трибјут бенд Филиграни.
И за секое понатамошно кршење на моите авторски права, ќе барам отштета од 10.000 евра за секое изведување (само минатата година имаа околу дваесет настапи низ регионот, да не ги спомнувам претходните децении, па дури и појавувања со моите песни на други континенти, бидејќи ги изведуваат моите песни под мојата слика и со името на мојата компанија, тие забиваат клин во мојето стапало).

Ова го наведувам особено затоа што воопшто не обрнуваат внимание на моите протести, кои траат од 1995 година. Главната причина е што тие, како и другите, ме омаловажуваат со своите лоши изведби и со тоа што ме претставуваат во свое светло, бидејќи како би можело да биде поинаку кога станува збор за познатиот ѓавол? Со еден збор, тие стануваат замена за она што не се, и со тоа добиваат причина за живеење и многу добра работа, наместо да одгледуваат добиток на фарма или да ги чистат улиците и да собираат ѓубре, што спаѓа во општествено корисна работа, за што имаат мое одобрение.”

Оваа изјава дополнително ја продлабочува повеќедецениската расправа што Штулиќ ја води, и со дискографски компании и со изведувачи кои ја толкуваат неговата работа. Авторот на песните “Balkan” и “A šta da radim” со години инсистира на целосна контрола врз своето дело и не ги смета концептите на трибјут-бендови за омаж, туку за неовластено користење на неговото творештво.
Досега нема официјална реакција од белградскиот бенд “Филиграни” или од организаторите на концертот за оваа забрана. Прашањето како ќе се реши ситуацијата правно и организациски останува отворено, со оглед на тоа што песните на “Азра” со децении се дел од живиот репертоар на бројни бендови низ регионот.

Б.Н.