Во западниот дел на Рио де Жанеиро, во подрачјето Recreio dos Bandeirantes, се случи тешка воздушна несреќа при која два хеликоптери се судриле во воздух, по што двете летала паднале и предизвикале пожар на земја. Според информациите од локалните служби, во несреќата загинале шест лица.
Еден од хеликоптерите паднал на просторот на автосалон со паркирани електрични возила, при што избувнал голем пожар кој зафатил околу 20 автомобили. Екипите на противпожарната служба успеале да го локализираат и изгаснат пожарот, но материјалната штета е значителна.
Според наводи од полицијата и странски медиуми, во едно од леталата се наоѓал американскиот музичар Оливер Три (32), кој престојувал во Бразил како дел од својата светска турнеја. Заедно со него, според истите извори, биле и бразилски музички продуцент, аргентински видео режисер и аргентински YouTuber Gaspar Prim.
Вториот хеликоптер наводно превезувал пилот, додека во првиот имало четири патници и пилот. Нема преживеани.
Причината за судирот сè уште не е позната. Бразилската полиција и надлежните служби започнаа истрага за да се утврдат околностите на несреќата, вклучително и можноста за човечка грешка или технички дефект.
Оваа несреќа привлече големо внимание во јавноста поради тоа што меѓу патниците имало познати личности од музичката и дигиталната индустрија. Истрагата е во тек, а повеќе информации се очекуваат по завршувањето на идентификацијата на жртвите и анализата на пронајдените податоци од летот.
Б.Н.