Од 17 до 19 јули 2026 година, Прилеп повторно ќе биде домаќин на една од најголемите и најпосетени културно-забавни манифестации во земјава – Пиво Фестивал, кој оваа година ќе го одбележи своето 23-то издание.
Градоначалникот на Прилеп, Дејан Проданоски, преку објава информираше дека подготовките за фестивалот се во тек и дека градот ќе биде подготвен да ги пречека илјадниците посетители од Македонија и регионот.
„Со поддршка на Општина Прилеп и во организација на здружението ‘Вајб Евентс’, и оваа година ќе имаме три незаборавни фестивалски вечери исполнети со врвна музичка програма, вкусна прилепска скара, богата понуда на пиво и одлична атмосфера во срцето на градот“, истакна Проданоски.
Според најавите, годинашното издание на фестивалот ќе донесе и атрактивна музичка програма со настапи на познатите регионални музички ѕвезди Џенан Лончаревиќ, Милица Павловиќ и Јелена Розга, како и други изведувачи чии имиња дополнително ќе бидат објавени од организаторите.
Локалната самоуправа, заедно со јавните претпријатија, надлежните служби и институции, веќе работи на организациските и логистичките подготовки за успешна реализација на фестивалот, со цел Прилеп уште еднаш да се покаже како добар домаќин на бројните гости.
Пиво Фестивал традиционално привлекува десетици илјади посетители и претставува еден од најзначајните туристички и забавни настани во земјата, препознатлив по богатата музичка програма, гастрономската понуда и фестивалската атмосфера.
Годинашното издание ќе се одржи од 17 до 19 јули на повеќе локации во централното градско подрачје на Прилеп.
Б.Н.
