Со спектакуларна изведба на монументалното дело „Кармина Бурана“ во Градскиот парк во Скопје, Филхармонијата на свечен начин ја заокружи концертната сезона „Без Филтер“, испраќајќи силна порака дека музиката и уметноста се универзален јазик што ги поврзува луѓето без оглед на нивната националност, култура или потекло.
Пред бројна публика, повеќе од 200 уметници од Македонија, Бугарија и Грција настапија на иста сцена, создавајќи вечер исполнета со емоции, енергија и заедништво. На изведбата учествуваа оркестарски и хорски состави од трите земји, како и хорот на Националната опера и балет, детскиот хор „Пиколо“ и хорот од Музичкото училиште во Солун.
Регионалниот проект, чиј иницијатор е бугарскиот маестро Најден Тодоров, претходно беше претставен во Софија и Солун, а своето финале го доживеа токму во Скопје. Под негово диригентско водство, здружените ансамбли уште еднаш потврдија дека уметноста има моќ да ги надмине границите и да создаде простор за дијалог, разбирање и меѓусебна почит.
Посебен белег на концертот му дадоа солистите – македонската сопранистка Ана Дурловски, грчкиот тенор Николас Спанос и бугарскиот баритон Иво Јорданов, чии изведби беа наградени со долги аплаузи од публиката.
Вечерта во Градскиот парк не беше само музички настан, туку и симбол на регионалната соработка и културното поврзување. Преку моќните тонови на „Кармина Бурана“, уметниците испратија јасна порака дека музиката останува една од најсилните сили што ги обединува луѓето, градејќи мостови таму каде што постојат разлики и потсетувајќи дека културата е заеднички простор во кој сите можат да се препознаат.
В.К.
