Орце Ѓорѓиевски за Викимедиа: Не само лопати, во кабинетот чувам и ленти од камен темелници, затоа што тие сведочат за успесите и постигнувањата!

Орце Ѓорѓиевски, актуелниот градоначалник на Општина Кисела Вода, и кандидат за градоначалник на Град Скопје од редовите на ВМРО-ДПМНЕ за претстојните избори, деновиве се најде во центарот на вниманието, откако на социјалните мрежи започна масовно да се споделува негова фотографија, направена минатата година, во неговиот кабинет.

На истата, во аголот на кабинетот се гледаат поставени лопати, а пак на бирото машки парфем. Пред избори, кога детално се ,,чешлаат” социјални профили и стари фотографии на актуелните кандидати за јавни функции, фотографијата беше повод за да тргне лавина од коментари на темата зошто Ѓорѓиевски ги чува лопатите во кабинет, па дури се објавуваа и анализи околу спецификациите и значењето на парфемот кој го користи.

За Викимедиа, Ѓорѓевски вели дека лопатите се наоѓаат во неговиот кабинет уште од кога стапил на функција, и кога започнал со продуктивна работа. Но, не само лопати, туку ги чувал и сите ленти од камен темелници, кои биле пресечени во тек на неговиот мандат, бидејќи тие биле знак дека посветено се работи.


-Еден ден, кога ќе завршам со политика, сите ленти од камен темелниците, како и лопатите со кои сме означиле почеток на изградба на нешто ново и вредно во градот, ќе ги однесам дома. Секако дека ќе ги чувам, горд сум на нив, секоја од нив има своја приказна за успешно менаџирање, за продуктивност и создавање на нови проекти, кои ќе останат за идните генерации.
И истото им го посакувам на сите градоначалници, да имаат што повеќе ленти и лопати, да имаат што е можно повеќе реализирани проекти, вели градоначалникот.


Околу машкиот парфем на бирото, вели дека долги години го користи истиот и дека не гледа ништо спорно во тоа што случајно се нашол на фотографијата. Се работи за One Million на Пако Рабане, класичен парфем кој е избор на многу мажи, и кој може да се купи по цени од 2.500 до 6.000 денари, во зависност од милилитражата.


Инаку, кога беше најавена кандидатурата на Ѓорѓиевски за градоначалник на Скопје на претстојните локални избори кои ќе се одржат во октомври, тој кажа дека е време да се изгради град со кој ќе се гордеат сегашните, но и идните генерации.
Премиерот Христијан Мицкоски пак, порача дека Ѓорѓиевски е новата енергија која му е потребна на градот.

Вики Клинчарова