Општина Битола ја информира јавноста дека во врска со спомен – плочата посветена на Александар Турунџев се појавија јавни реакции поради визуелниот изглед на користениот фонт, соопштија утрово од Општина Битола, откако синоќа со пригодна свеченост беше откриен споменикот на војводата Александар Турунџиев. Како што наведуваат во соопштението, од општината решиле да изработат нова спомен плоча, поради реакциите кои ги предизвикаа буквите на сегашната, а за кои во јавноста се коментира дека наликуваат на латинични знаци.
-Забелешките беа насочени кон тоа дека буквите изгледаат како да се напишани со туѓа ортографија. Сепак, стручната лингвистичка анализа покажува дека не станува збор за туѓа ортографија, туку за типографско решение во декоративен стил, каде одредени форми повеќе наликуваат на латинични знаци отколку на кирилични.Таквата визуелна сличност го создаде впечатокот на погрешно напишани зборови.
Имајќи ја предвид чувствителноста на прашањето и значењето на јазикот и писмото како дел од националниот идентитет, Општина Битола ќе изработи нова спомен – плоча со современ македонски фонт, целосно усогласен со правописните норми на македонскиот литературен јазик.
Со овој чекор, целта е да се избегне секаква забуна и да се обезбеди јасна и прецизна јазична форма, како што прилега за јавните обележја што ја чуваат историската меморија и сите други форми на јазичен израз.
Општина Битола останува посветена на негување на јазичната исправност, културната традиција и достоинственото чествување на хероите што се вградиле во слободата на Македонија, соопштија од Општина Битола.
Деск
