Европската Унија усвои нов пакет правила за возачките дозволи, со кои се воведуваат дигитални дозволи, построги безбедносни мерки за младите возачи и подобра координација меѓу земјите членки при санкционирање на сообраќајни прекршоци.
Според новите правила, граѓаните на ЕУ во иднина ќе можат да користат дигитална возачка дозвола на мобилен телефон, која ќе биде признаена во сите земји членки. Сепак, класичната пластична дозвола нема целосно да исчезне и ќе остане достапна за оние кои сакаат да ја користат.
Една од најзначајните промени е воведувањето задолжителен пробен период од најмалку две години за новите возачи. Во текот на овој период ќе важат построги правила и казни, особено за возење под дејство на алкохол, користење мобилен телефон и други ризични однесувања во сообраќајот.
Новите европски правила предвидуваат и можност 17-годишници да управуваат со возило, но само во присуство на искусен возач. Целта е младите лица постепено да стекнат искуство пред целосно самостојно учество во сообраќајот.
Во јавноста посебно внимание привлече прашањето за постарите возачи. Иако на социјалните мрежи се појавија тврдења дека ЕУ ќе им ги одзема дозволите на лицата над 65 или 70 години, таква одлука не е донесена. Наместо тоа, секоја држава членка самостојно ќе одлучува дали и како ќе воведува дополнителни здравствени проверки за постарите возачи.
Дополнително, земјите членки ќе имаат подобра меѓусебна размена на информации, што значи дека забраните за возење изречени во една држава полесно ќе се признаваат и во другите земји на ЕУ.
Европските институции наведуваат дека целта на реформата е намалување на бројот на сообраќајни несреќи и модернизација на системот за возачки дозволи во целата Унија.
Промените нема да стапат на сила веднаш. Земјите членки ќе имаат неколку години за усогласување на националните закони, а поголемиот дел од мерките постепено ќе се применуваат до крајот на деценијата.
Деск
