Биографскиот филм „Michael“, посветен на животот и кариерата на кралот на поп-музиката Мајкл Џексон, испиша историја на светските кино-благајни. Филмот досега оствари заработка од околу 977 милиони долари, со што официјално стана најуспешниот биографски филм на сите времиња.
Со овој резултат, „Michael“ го надмина досегашниот рекордер, оскаровецот „Oppenheimer“ на режисерот Кристофер Нолан, кој оствари нешто помала светска заработка. Претходно, филмот веќе ја освои титулата најуспешен музички биографски филм, надминувајќи го и „Bohemian Rhapsody“.
Режијата е на Антоан Фукуа, а во главната улога настапува Џафар Џексон, внук на легендарниот пејач. Неговата интерпретација на Мајкл Џексон доби бројни пофалби од публиката, која го оцени филмот како едно од највпечатливите биографски остварувања во последните години.
И покрај огромниот комерцијален успех, критичарите остануваат поделени. Дел од нив сметаат дека филмот недоволно се осврнува на контроверзиите и обвинувањата што го следеа Џексон во подоцнежниот период од неговиот живот.
Успехот на „Michael“ придонесе и за нов бран интерес за музиката на Мајкл Џексон, при што неговите песни повторно бележат милионски слушања на стриминг-платформите. Според странските медиуми, филмското студио веќе размислува за продолжение на приказната, поттикнато од извонредниот интерес на публиката ширум светот.
