Мирослав Милатовиќ Вицко, единствениот преживеан основач и долгогодишен тапанар на легендарниот рок-бенд Рибља Чорба, објави нов соло-албум насловен “Nema duge ako nema kiše”. Изданието е достапно на ЦД и дигитални платформи, објавено од издавачката куќа Фидбакс.
На албумот се содржани десет оригинални песни — со музика, текст и целосна продукција на самиот Вицко, откривајќи поинтимна и поемотивна страна на неговата работа. Снимањето се одвиваше кон крајот на 2024 и почетокот на 2025 година во студијата “Music Art”, “L8night” и “Revenge” во Белград, со миксање од Никола Зориќ и Вицко, и мастерирање од Стефан Родиќ.
Визуелниот идентитет на албумот исто така има посебно значење: сите фотографии се дело на познатиот фотограф Бранислав Рашиќ, додека дизајнот на омот е дело на истакнатата графичка дизајнерка Бранислава Стефановиќ. Извршен продуцент на изданието е Горан Јовиќ.
Покрај Вицко, кој ги сними главните вокали, бас-гитара, тапани и перкусии, на албумот исто така учествуваат и неговите колеги од Рибља чорба — Видоја Божиновиќ Џинџер (гитара), Никола Зориќ (клавијатури) и Јован Јефтиќ Јоца Змај (споредни вокали). Како специјални гости се појавуваат и “Децата на Чорба” — синовите и ќерките на сегашните и поранешните членови на бендот: Борис Ѓорѓевиќ, Реља Милатовиќ, Ивона Божиновиќ, Димитрије Чутурило и Милена Зориќ.
Веќе е достапен и првиот музички спот од албумот — за песната “Сликарот што црта со зборови”, во кој се слуша соло гитара од Димитрије Чутурило. Режисер на видеото е Бранислава Стефановиќ, што на целиот проект му дава дополнителна креативна кохезија.
Б.Н.
