ЈА ГРАБНАЛ ОД ДОМА, ЈА УБИЛ И ЈА ЗАКОПАЛ ВО ДУПКА ВО АТАРОТ НА ГОСТИВАРСКО НЕГОТИНО!

Грозоморно убиство ја вознемири јавноста, а жртва е 53-годишна жена, која од својот дом била внесена во автомобил, убиена со пиштол и закопана во дупка во атарот на гостиварското село Неготино. Осомничениот е лишен од слобода, соопшти Министерството за внатрешни работи.


-Надворешната канцеларија за криминалистички работи Гостивар поднесе кривична пријава против С.М.(53) од с.Неготино, општина Врапчиште, поради постоење основи на сомнение за сторено кривично дело „убиство“ по член 123 од Кривичниот законик. Имено, на 09.12.2025, Ј.М.(34) од гостиварско пријави дека неговата мајка Х.А.(53) од с.Равен, гостиварско, се оддалечила од домот, а подоцна на безбедносните камери забележал дека на 07.12.2025 таа влегува во патничко возило „фиат“, по што е недостапна на телефон.

Исто така, тој пријави дека на безбедносните камери забележал дека ноќта помеѓу 06.12. и 07.12.2025 С.М. влегол и пребарувал во неговата куќа и дека биле одземени пари од неговата соба. На 11.12.2025 во 02:15 часот, С.М. беше лишен од слобода поради сомнение дека ја принудил Х.А. да замине од домот со него, велат од полицијата.


Додаваат дека по преземени мерки во врска со случајот, по извршени проверки на видео записи, констатирано е дека пријавениот дал лажен исказ во полициска станица.


-Воедно, од добиениот листинг на повици утврдено е дека Х.А. последен пат имала контакт со него на 07.12.2025.

Подоцна, со судска наредба, извршен е и претрес во домот на С.М., по што од слобода е лишена и неговата сопруга Ѓ.В.(48). Во службен разговор во полициска станица, Ѓ.В. признала дека нејзиниот сопруг С.М. со пиштол ја убил Х.А., а го посочила и местото каде е закопана.

После тоа, полициски службеници од Надворешната канцеларија за криминалистички работи Гостивар во присуство на јавен обвинител извршија увид на местото во атар на село Неготино каде било пронајдено телото на Х.А.. По наредба на јавен обвинител, телото е дадено на обдукција, соопштија од МВР.


Од Основното јавно обвинителство Гостивар извршиле увид, а јавниот обвинител наредил обдукција и идентификација на починатото лице и прибирање траги од лице место.

-Во текот на ноќта беа преземени повеќе истражни дејствија, по што за едно осомничено лице е одредена мерка краткотраен притвор од 48 часа за обезбедување докази, додека уште едно лице е задржано и за него се вршат проверки. По наредба на јавниот обвинител се преземаат дејствија за целосно испитување на настанот, велат од ОЈО.

Деск