По речиси четири децении поминати во циркус, африканската слоница Џули конечно доби можност да започне нов живот во засолниште, каде ќе живее во поприродна средина и без настапи пред публика.
Џули била дел од португалскиот циркус „Виктор Хуго Кардинали“ од 1988 година. Со стапувањето во сила на забраната за користење диви животни во циркуси во Португалија, таа престанала да настапува, а надлежните започнале процес за нејзино трајно згрижување.
Нов дом за слоницата ќе биде специјализирано засолниште во регионот Алентежо, управувано од фондацијата „Pangea Trust“. Таму Џули ќе има можност да живее во значително подобри услови, со повеќе простор за движење и природно однесување.
Во засолништето ќе ѝ се придружи и слоницата Кариби. Експертите потсетуваат дека слоновите се исклучително социјални животни, па присуството на други единки е важно за нивната психичка и физичка благосостојба.
Ова засолниште е едно од најголемите во Европа наменети за згрижување слонови кои претходно живееле во циркуси и зоолошки градини. Иако неговиот капацитет е ограничен, претставува значаен чекор во обезбедувањето подобри услови за животните кои со години биле користени за забава.
Приказната за Џули е уште еден пример за промените што се случуваат во Европа, каде сè повеќе земји воведуваат забрани за користење диви животни во циркуски претстави, ставајќи го нивното благосостојба и заштита во преден план.
