Силно невреме попладнево го зафати Скопје, предизвикувајќи материјални штети на повеќе локации во градот. Силниот ветер носеше кровни конструкции, паѓаа дрва, а граѓаните пријавуваат различни оштетувања предизвикани од невремето.
Поради состојбата, во Општина Ѓорче Петров е активиран кризен штаб, а жителите можат да пријавуваат штети и проблеми на дежурните телефони. Екипите се на терен и ги следат последиците од невремето.
Во моментов нема официјални информации дали има повредени лица. Надлежните служби продолжуваат со проверки на терен, а граѓаните се повикуваат да бидат внимателни и да избегнуваат места каде што постои опасност од паднати дрвја, предмети или оштетени објекти.
Дополнителни информации за состојбата се очекуваат по завршувањето на првичните проценки на штетите.
