По повод 80-годишниот јубилеј на Сојузот на здруженија на пензионери на Македонија, денес се одржа свечен настан на кој се обрати министерот за здравство Азир Алиу. Тој истакна дека осумте децении посветена работа, солидарност и грижа за повозрасните граѓани претставуваат значаен придонес за општеството и доказ за незаменливата улога на сојузот.
Во своето обраќање, министерот нагласи дека грижата за пензионерите не е само социјална обврска, туку и показател за зрелоста и хуманоста на едно општество, додавајќи дека оваа област останува еден од врвните приоритети на Министерството за здравство.
Алиу се осврна и на предложените измени на Законот за здравствена заштита, со кои се предвидува пензионерите на возраст од 64 до 67 години да можат да продолжат со работа доколку постои потреба, додека специјалистите над 67 години би имале можност да работат до 70-годишна возраст. Според него, со овие измени се вреднуваат искуството, знаењето и долгорочниот придонес на здравствените работници.
Дополнително, тој информираше дека преку програмите на Министерството е обезбедено бесплатно болничко лекување и ослободување од партиципација за пензионерите со пониски примања. Овие мерки, како што посочи, имаат за цел да се намали финансискиот товар и да се олесни пристапот до неопходна здравствена заштита за најранливите категории граѓани.
Деск