Љубителите на добрата музика в среда, на 13 мај, ќе имаат можност да уживаат во вистински музички спектакл во Неготино, каде на платото пред НУЦК „Ацо Ѓорчев“ Неготино со почеток во 20:30 часот ќе се одржи традиционалниот џез фестивал JAZZ 1440.
Фестивалот, кој се организира од 2014 година, прерасна во еден од најпрепознатливите музички настани во регионот, привлекувајќи бројни љубители на џезот и квалитетниот звук.
Годинашното издание носи моќна програма и настапи на врвни музички состави – Equinox Jazz Quartet, S.S.A. Trio и Јован Цветковиќ Квартет, кои ветуваат вечер исполнета со емоции, импровизации и енергични џез изведби.
Организаторите најавуваат незаборавна атмосфера под отворено небо, каде публиката ќе може да ужива во магијата на џез музиката и уникатниот спој на ритам, страст и уметност.
Од Центарот за култура упатуваат покана до сите граѓани и посетители од регионот да бидат дел од фестивалската вечер што ќе го претвори Неготино во центар на џез музиката.
(Галерија од изминатите изданија на џез фестивалот JAZZ 1440)
В.К.