НИЕ НЕ СМЕ СОЦИЈАЛНИ СЛУЧАИ, ТУКУ ХЕРОИ, И БАРАМЕ СТАТУС НА РОДИТЕЛ – НЕГУВАТЕЛ: НАД 900 ЛИЦА УШТЕ ПРЕД ЕДНА ГОДИНА БАРАА РЕШАВАЊЕ НА ГОРЧЛИВИОТ ПРОБЛЕМ, ГЛАСОТ УШТЕ НЕ ИМ Е СЛУШНАТ!

Над 900 лица пред една година ја потпишаа петицијата Добивање на статус родител – негувател на еден од родителите на лице со попреченост, чиј иницијатор беше Анче Туфекчиева од Струмица, мајка на Верче која е девојче со Даунов синдром, и претседателка на здружението ,,Вера”.
По една година, гласот кој го крена оваа петиција, се уште не е слушнат од државата, а родителите на децата со попреченост остануваат со нерешен статус.
Темата повторно се актуелизираше деновиве, откако во соседна Србија претседателот Александар Вучиќ соопшти дека државата воведува статус родител – негувател, а родителите на деца со попреченост ќе добиваат месечни примања во износ од околу 500 евра, плус платено пензиско и здравствено осигурување.

Како што беше наведено во петицијата која беше актуелна лани, околу 200.000 семејства во земјава, кои имаат дете со попреченост, се херои кои системот секојдневно ги гази. Родителите кои биле принудени да се откажат од работата за да можат да ги чуваат своите деца, немаат осигурување, ниту пак плата, а не им следувала ниту пензија.
Поради тоа, Анче Туфекчиева поддржана од родители на деца со попреченост, бараше рамноправност, односно стаус на родител – негувател за овие родители.

-Во нашата земја мајката /таткото на дете со попреченост не се признаени со закон.
Ни треба закон за родител – негувател!
Ние не сме згрижувачи, ние сме биолошки родители кои ги негуваат своите деца со попреченост 24 часа на ден, со години, со децении… без плата, без осигурување, без пензија…

Многу од родителите неможат да работат затоа што нема кој да го гледа детето.
Неможеме да одиме на лекар, неможеме дури и да легнеме кога ќе се разболиме, неможеме ни да одиме на вечера со пријатели ако нема кој да се грижи за нашето дете.

И секоја чест на секој Згрижувач на дете со попреченост, им се поклонувам до земја.. Но дали мислите дека и ние не треба да сме подеднакво исти и рамноправни како биолошки родители. Но, ние си молчиме, бидејќи немаме време да викаме затоа што секојдневната борба ни е поважна од било што, појаснуваше Туфекчиева во петицијата.

Додаде дека е време да се слушне нивниот глас, бидејќи онаму каде што се носеле одлуките за овие деца и нивните семејства, одамна немало хуманост.



-И гледајќи што секојдневно ни се случува и дека хуманоста веќе оддамна ја нема таму каде што се носат одлуките, мислам дека е време да го кренеме нашиот глас.
И не, оваа приказна не е само за мене и Верче и за нашето семејство оваа приказна е секојдневие на повеќе од 200.000 семејства во нашата држава, а да не зборуваме за Мајките со попреченост кои покрај својата попреченост подариле живот и нив никаде ги нема.
Нашите семејства не се социјални случаи, нашите семејства се херои кои секојдневно системот ги гази!Мислам дека е време да се организираме и да добиеме статус на родител – негувател!

Можеби ќе ни биде потребно многу време но да го направиме тоа за секое семејство на лице со попреченост! Да го направиме тоа за идните генерации! Очекуваме поддршка од сите, истакна храбрата мајка.

Деновиве, по веста од Србија за тамошното решавање на овој горчлив проблем, бројни се јавните апели и кај нас, конечно да им се излезе во пресрет на овие семејства, кои се невидливи за системот.


В.К.