Канада би можела да се приклучи на натпреварот за песна „Евровизија“ веќе од следната година, откако канадскиот јавен радиодифузер CBC/Radio-Canada стана полноправен член на Европската радиодифузна унија (EBU), што е клучен услов за учество.
Според правилата на EBU, право на учество имаат земји чии јавни медиумски сервиси се членки на организацијата. До неодамна, CBC имаше статус на придружен член, но со новото полноправно членство Канада формално ги исполнува основните критериуми за евентуален влез во натпреварот.
Идејата за учество на Канада ја поддржува и премиерот Марк Карни, кој во рамки на својот политички курс за поблиски односи со Европа предложи и разгледување на можноста за канадско учество на „Евровизија“. Владата во буџетот за 2025 година предвиде околу 150 милиони канадски долари за јавниот сервис, кој заедно со EBU ја анализира можноста за учество.
Генералниот директор на EBU, Ноел Каран, изјави дека новото членство на Канада ја зајакнува организацијата, нагласувајќи дека „гласот на Канада во оваа заедница нè прави посилни“.
Иако Канада досега не настапувала официјално на Евровизија, канадски уметници веќе имаат значајно присуство во историјата на натпреварот. Најпознат пример е Селин Дион, која во 1988 година победи настапувајќи за Швајцарија, што ѝ ја отвори светската музичка кариера.
Други канадски изведувачи, како Наташа Сент-Пјер (Франција, 2001) и Ла Зара (Франција, 2023), исто така учествувале на натпреварот претставувајќи други држави.