Денот кога цела Југославија плачеше… ,,Почина другарот Тито. На 4 мај 1980 година, во 15:05 часот, во Љубљана престана да чука големото срце на претседателот на Социјалистичка Федеративна Република Југославија и претседател на Претседателството на СФРЈ, претседател на Сојузот на комунистите на Југославија, маршал на Југославија и врховен командант на вооружените сили на СФРЈ, Јосип Броз Тито.”
Веста тогаш ја соопштија Претседателството и Централниот комитет на Сојузот на комунистите на Југославија, со што беше означен крајот на една историска епоха и почеток на период на длабока неизвесност за државата. На денешен ден, 4 мај, се навршуваат 46 години од смртта на Јосип Броз Тито, еден од најзначајните политички лидери на Балканот во 20 век и долгогодишен претседател на поранешна Југославија.
Тито почина во 1980 година во Љубљана, по долга болест предизвикана од компликации со циркулацијата. Веста за неговата смрт предизвика шок и длабока тага низ целата земја. Илјадници граѓани излегоа на улиците, а државата беше завиена во повеќедневна жалост. Симболичен момент од тој ден остана прекинот на фудбалскиот натпревар меѓу Хајдук и Црвена звезда, кога публиката во солзи ја испрати веста за смртта на претседателот.
Како лидер на партизанското движење за време на Втората светска војна, Тито одигра клучна улога во ослободувањето на земјата и формирањето на Социјалистичка Федеративна Република Југославија. Во текот на своето владеење, тој ја водеше државата по специфичен пат, одржувајќи баланс меѓу Истокот и Западот и градејќи политика на неврзаност.
Неговото наследство и денес предизвикува поделени мислења. За едни, Тито претставува симбол на стабилност, економски развој и меѓународен углед. За други, неговото владеење е поврзано со авторитаризам и ограничување на политичките слободи.
И покрај различните гледишта, едно е сигурно – фигурата на Тито останува длабоко врежана во колективната меморија на народите од поранешна Југославија, а неговото влијание сè уште се чувствува и денес.
Деск
