На граничните премини меѓу Македонија и Грција и понатаму се создаваат долги колони од возила, при што патниците чекаат и по неколку часа за да ја преминат границата, особено за време на викендите и во шпицот на летната сезона.
Најголеми задржувања се забележуваат на преминот Богородица–Евзони, како и на Дојран и Меџитлија, каде зголемениот туристички сообраќај значително го забавува протокот на патници.
Според граѓани, кои заглавиле во колоните и објавуваат фотографии од метежот на сцијалните мреи, на групи наменети за оние кои патуваат во Грција, чекањето во редиците понекогаш е мачно поради високите температури, но тоа не ги поколебува да продолжат со своите планови за летен одмор или викенд патувања кон грчките туристички центри.
„За викенд знае да се чека и по неколку часа, но сепак не се откажуваме. Грција ни е блиску и навикнати сме на вакви гужви. Штом стигнеме до морето, забораваме на мачното чекање на граница“, велат патниците.
Меѓу патниците не се само граѓани од Македонија, туку и туристи од Србија, Германија и други европски земји, кои транзитираат или патуваат кон грчкото крајбрежје.
И покрај метежите, Грција останува една од најпосетуваните летни дестинации во регионот, со континуиран прилив на туристи од повеќе држави, што дополнително го оптоварува граничниот сообраќај во летните месеци.
В.К.
