Министерот за здравство Арбен Алиу најави дека лично ќе се регистрира како органодарител, испраќајќи порака за поддршка на системот за донирање органи и за подигање на јавната свест за значењето на трансплантацијата.
„Јас ќе бидам првиот што ќе се регистрира како органодарител. Секој полнолетен граѓанин ќе може кај својот матичен лекар да се произнесе дали сака да биде органодарител. Изјаснувањето ќе се врши преку нов дигитален модул во ‘Мој термин’, безбедно и со двојна верификација. Секој граѓанин ќе може во секое време да ја промени или да ја повлече својата одлука“, изјави Алиу на панел дискусија во Гостивар, нагласувајќи дека со личен пример сака да ги охрабри граѓаните да ја разгледаат можноста да станат донори.
Тој посочи дека органодарителството претставува хуман чин кој може да спаси повеќе животи и истакна дека е неопходно да се гради доверба во здравствениот систем и да се промовира култура на солидарност.
Изјавата доаѓа во период кога здравствените власти работат на унапредување на програмата за трансплантација и на зголемување на бројот на потенцијални донори. Според надлежните, покрај развојот на медицинските капацитети, клучна улога има и информирањето на јавноста за постапките и придобивките од донирањето органи.
Од Министерството за здравство очекуваат ваквите иницијативи да придонесат за поголема подготвеност кај граѓаните да се вклучат во системот на органодарителство, со што ќе се зголемат шансите за спасување на пациенти кои чекаат трансплантација.
Органодарителството во Македонија се спроведува согласно законските процедури и со согласност предвидена во важечката регулатива, а трансплантацијата останува единствено решение за многу пациенти со тешки заболувања на виталните органи.
